【邪成咁？】原來佢哋都喺莫雷拉手上出事

莫雷拉近年雄霸香港馬壇，佢嘅騎功有幾犀利，相信大家有目共睹，唔需要再多加形容。而圈中唔少練馬師都對雷神趨之若騖，因為得佢效力，簡直係如有神助。雷神勁還勁，不過又唔係個個都受得住雷神嘅硬功，最近就有多匹焦點馬喺佢胯下連環出事，今朝又加多宗日本城老闆劉栢輝名下嘅七位數字天價愛駒「家品皇者」，由雷神主課後傷重跛腳，咁啱得咁橋成咁，真係十分離奇。

除咗「家品皇者」之外，雷神嘅前科仲包括上季策騎史上首匹四歲三冠王「佳龍駒」，出戰冠軍一哩賽中途拉停，其後馬匹被發現盤骨骨裂，結果重傷不治，當時已震驚整個馬壇。另一奇案就係被稱為絕世好馬嘅「巴基之星」，明明之前拍蔡明紹同蘇兆輝，唔計佢慢閘都冇乜事故，但換咗雷神後，先喺精英碟中途罷跑，其後試閘又再次去到千四米起步點時突然收步，此駒目前仍被馬會禁賽中。而近期連日見到佢晨課加操時，都係扭扭擰擰，似乎仍未克服心理關口。如今仲加埋「家品皇者」出事，難怪唔少網民都話雷神當黑。其實大家又唔可以話晒雷神嘅，雷神平時份人一向有愛心，又出名愛護馬匹，發生上述事件都只係巧合，純屬不幸。意外總歸係意外，真係冇人想嘅！