笑看天下：一餐飯見教育失敗-施友朋

上東網，睇見「大學生唱大排檔開天索價，火炭老闆娘感被屈」，老朽草此文時，見到有成三點八萬人推介，可見事件引來不少讀者關注。東網記者又再斬多四両，「唱大排檔屈客傳是科大生，網民齊撐老闆娘」；涉事大排檔老闆娘向記者呼冤受屈後，再怒轟涉事嘅四十多名大學生，直斥不歡迎他們再幫襯，更不需要上門道歉。

看來老闆娘氣難平真係動了真火──招呼四十多個近乎餓狼嘅青年人，白飯都食咗一百五十多碗，樣樣貴價餸都要「散叫三例」（即三倍分量），又識飲識食叫了四條大白鱔，每條三百六十八蚊，淨白飯加四條鱔都成三千銀，阿哥，埋單收你一萬確係「貨真價實」，點屈你哋呢班「天之驕子」呢？

身為大學生，受過良好教育，理應學會尊重自己、尊重別人，做個有紀律嘅人；「青春一去永不重逢，海角天涯無影無蹤」，青春可愛但不長久，青春不是用來任性妄為，隨意屈人，以為咁就型！老朽一早在此販文認可區已痛斥大學生「舉黃傘、屁股對嘉賓行畢業禮」是大學墮落嘅開始！並指出有大學校長竟曲意逢迎，認為咁做「有創意」，這不是誤人子弟嗎？大學變成咁，敢問能培養啲乜嘢「人才」？

人必自侮而後人侮之，唔好怪老闆娘唔歡迎你哋再去幫襯！老朽只希望你哋好好吸取教訓，學會做個正直嘅常人。錢理群教授曾在一個討論「理想大學」的專題上說：我們的一些大學，包括北京大學，正在培養一些「精緻的利己主義者」，他們高智商、世俗、老到，善於表演，懂得配合，更善於利用體制達到自己的目的，這種人一旦掌握權力，比一般的貪官污吏危害更大。

從一餐飯亦可見到今之部分大學生低俗至亂屈人，他們一旦掌握權力，江湖從此多事，人民頭痕，社會不安。