太一叮：港產官僚唔識寶　本土音樂當係草

唔少香港人鍾意去台灣旅行，除咗因為有地利之便，更因為當地有獨特嘅文化氣息，尤其係台灣人識得珍惜歷史及珍惜音樂，好多嘢值得香港人借鑑㗎。

呢，為咗保存及推廣本土音樂，四百多名香港音樂人早前要求康文署轄下嘅音樂事務處設立音樂庫，令更多人了解音樂同本地發展嘅關係，點知康文署闊佬懶理，成件事好似石沉大海咁，音信全無。既然此路不通咯喎，呢班音樂人嘗試向台灣中央廣播電台投石問路，提出相同建議，本來只係諗住碰運氣，結果有意外之喜，即日就獲對方答允，大力推廣香港音樂，而且大受好評添。咁都唔止吖，當地電台仲建議香港音樂人同樂隊去台灣宣傳交流，簡直係錦上添花。

所以話，牆內開花牆外香，港府當本土音樂係草，台灣電台就當係寶，你話係咪諷刺吖？正如音樂人話齋，本土音樂係香港文化及歷史嘅一部分，可以令年輕一代及外國遊客感受本港社會嘅變遷。好似一代歌神許冠傑咁吖，唔少歌曲反映基層市民嘅生活及工作狀況，唱到街知巷聞，成為香港流行樂嘅黃金時代，甚至曾橫掃東南亞，各地華人趨之若鶩，都咪話唔巴閉。可惜吖，港產官僚沉香當爛柴，唔止唔識得珍惜，近十年來嘅香港藝術節甚至連本港音樂人都冇份表演，問你服未。

係人都知，音樂冇國界，台灣固然將音樂當係寶，南韓政府直情當係國寶添。近年南韓以流行音樂作為文化產業嘅主打項目，不遺餘力推廣及發展，除咗每年大量撥款支持，更不惜動用國家力量推廣，甚至結合觀光旅遊業推出流行文化追星之旅，結果唔止文化產業有聲有色，而且帶旺旅遊等相關行業，對整體經濟及就業嘅貢獻無法估量。

話時話，本港音樂歷史悠久，一啲都唔輸蝕畀南韓，奈何港府一直零支持，只能自生自滅。對於本港音樂界嘅質疑，康文署例牌阿芝阿佐，藉口多多，其實大家都知道，港產官僚冇嘢叻，最叻就係卸膊，多做多錯，少做少錯，唔做唔錯，尤其係家陣「本土」兩個字特別敏感，港產官僚仲唔避得就避咩。

冇法子喇，同港產官僚講音樂講文化，仲慘過對牛彈琴。講到呢度，太一叮真係想送首《年少無知》二次創作版本畀港府，咪就係《官僚無知》囉，係咪好貼切呢？