功夫茶:旅業無復當年勇 好客之都過去式

20170701
東網電視
更多新聞短片
人之將走,其言也善。梁振英政府壽終正寢,唔少拍拍屁股鬆人嘅高官紛紛發表臨別感言,前商經局局長蘇錦樑亦唔例外,話香港旅業無復當年勇,提醒新政府唔好掉以輕心,應該善用文化創意、歷史景點及綠色資源,做到多元化發展,提升吸引力喎。
冇錯,過去五年香港亂象紛呈,競爭力每況愈下,可以食胡嘅產業已經唔多。本來呢,旅遊業被譽為無煙工業,既可帶挈零售、酒店、飲食及物流業受惠,又可帶動廣告、娛樂等周邊行業,係一條好好嘅出路,點知部分港人唔識珍惜,連客似雲來都唔高興,一味嫌錢腥,搞出連串趕客行動,「支那」前,「蝗蟲」後,傷盡內地旅客嘅心,加上業界良莠不齊,黑店劏客、強迫購物、辱罵旅客甚至打死旅客乜都齊,卒之求仁得仁,旅客過門而不入,肥水流向外人田咯喎,咪唔衰攞嚟衰囉。
睇吓旅遊發展局公布嘅數字就知喇,訪港旅客數字又跌嘞,今年五月份較四月份下跌近百分之四,無論係內地客、外國客、長途客抑或短途客都全線下跌,唔閉翳就假。過去有人話趕走內地「低端客」,可以吸引外國「高端客」喎,結果證明係自欺欺人。已過氣嘅蘇局長都不得不承認,近年嘅驅蝗、光復鬧劇對香港形象損害極大,一次踢篋足以令旅客卻步喎。
早知今日,何必當初,蘇局長依家先嚟覺悟,有冇再遲啲吖。大家唔會忘記,港府高官唔知邊度嚟嘅自信,成日自我催眠話香港旅遊同會展業嘅成就「並不膚淺,無懼競爭」,一味翹埋雙手等運到咁款,驅蝗鬧劇固然聽之任之,搞到班友仔胡作非為,變本加厲,犯法毫無成本,社會亂象一浪接一浪就係咁解;仲有呀,旅遊景點十年如一日,來來去去兩個主題樂園加個昂坪360,發展大嶼山又坐而論道,其他大型基建唔係延誤就係超支,直情倒米喇,點吸引旅客吖。
反觀周邊地區不斷進步,澳門、深圳、珠海煥然一新唔在講,上海迪士尼樂園後來居上,又搶去唔少客源,遲吓北京開埋環球影城,香港都唔知仲有乜本事同人競爭,都未講其他國家為咗爭取中國客法寶盡出。好似日本吖,唔少商戶最近開通埋支付寶,方便旅客購物,呢啲先係好客之道吖嘛。香港不思進取,服務態度又差,唧都唔識笑,點同人哋揮喎。
都係嗰句嘞,逆水行舟,不進則退。趁着回歸二十周年兼港府換屆,香港真係要的起心肝撥亂反正,重新出發,繼續內鬥內耗,任由競爭對手踩住上,盞玩死自己嘅咋。