功夫茶：摩天轮重开无期　废官僚侈谈大局

香港景点单调，来来去去唔系金紫荆广场就系主题公园，好不容易有中环海滨摩天轮呢个新地标，近年成为唔少市民同游客打卡嘅热点，点知依家又因为新旧营办商倾唔掂数，加上官老爷阔佬懒理，重开遥遥无期，真系唔得佢死。

话说中环海滨摩天轮上个星期失惊无神停开，搞到唔少游客摸门钉，鬼咁扫兴，原来系营办商合约八月底届满，不获续约，据闻佢哋同下一手商讨摩天轮接手事宜，一旦倾唔埋栏，旧营办商就要喺下个月底前进行拆卸“交吉”。事件寻日有新进展，有海滨事务委员会成员踢爆，原来旧摩天轮营办商早喺五月已经知道投标失败，但直至最后一刻仍然秘而不宣，批评咁做系想用公众压力做谈判筹码。

即系咁，商业谈判边个着边个唔着，外人好难讲得埋，但港府一样为旧营办商“保密”，咁就好离奇嘞。家阵最大嘅问题系，摩天轮又拆又起，究竟要搞到几时冇人知，但中环海滨靓地就肯定沦为沙尘滚滚嘅工地，唔单止影响香港形象，旅客同市民冇咗个消闲去处，仲未计当中造成嘅浪费，你话呢只镬边个孭先？

不可不知，中环海滨系官地，同私人物业始终唔同，如何保证善用涉及公众利益，官老爷冇可能置身事外，可惜事实啱啱相反，商务及经济发展局局长邱腾华一味大打官腔，强调当局一直有跟进新旧营办商嘅交接工作，希望佢哋以大局及整体效益出发，减少对游客及市民嘅影响，讲到好似完全唔关自己事咁。

难为官老爷仲好意思讲“大局为重”，搞成今日咁嘅烂摊子，正正系佢哋当初做漏招种嘅祸。中环海滨用地一向备受关注，港府以短期合约形式批出，营办商三年就要离场，欠缺长期规划，本身已经好唔理想。再讲吖，如果当年标书一早规定日后经营权改变，相关硬件设施系咪保留，相信今日就唔会出现咁多争拗。

讲开又讲，呢单嘢仲有好多疑团有待澄清。例如原有营办商做得好哋哋，当局点解突然重新招标？选择新营办商又有乜准则？当然喇，港产官僚可以大条道理，话重新招标合乎公平、透明原则，可以做到地尽其利，但如此一来问题又嚟嘞，家阵大把官地闲置，贱价租出作权贵私人会所有之，做富豪高尔夫球场有之，被霸占作废车场有之，又唔见官老爷咁紧张，收番嚟“重新招标”？

政府一方面身为全港最大地主，一方面唔识好好利用土地，冇规冇矩，中环海滨摩天轮沦为一笔糊涂帐，咪就系一个缩影啰。