功夫茶：工作生活皆不順　香港青年最缺夢

學周星馳話齋，做人冇夢想，同條鹹魚有咩分別？冇錯，做人唔止要有夢想，仲要有行動去圓夢，尤其係年輕人，更加應該對前途充滿希望。可惜吖，香港唔少後生仔對前景悲觀，冇夢想又冇行動，真係灰到爆㗎。

一項由香港、上海、台灣及新加坡四地合作嘅調查顯示，香港年輕人喺四地之中最缺乏夢想及圓夢動力，對未來經濟發展感到樂觀嘅淨係得一成咁大把；至於未來可否成功翻身嘅信心咯喎，更係敬陪末席。另外，多達七成一香港年輕人最擔心未來樓價過高；其次係憂慮未能學以致用及人工低於預期，一句到尾，即係錢作怪。反觀上海及新加坡年輕人對前景最樂觀，台灣年輕人則最有夢想。

香港後生仔一諗起置業問題就頭痛，唔係無緣無故㗎，呢，香港樓價連升十七個月，又創新高嘞，但人工加得雞碎咁多，點追吖。話時話，置業煩惱唔係香港獨有，另外三地嘅後生仔都有呢方面嘅壓力，不過心態就好唔同嘞，人哋充滿朝氣，對前途充滿希望，好似上海吖，經濟發展蓬勃，跨國企業紛紛進駐，年輕人有機會向上流動，憑努力可以改變命運，心情梗係靚啲；又好似新加坡，創新科技領先全亞洲，年輕人出路增加，點似得香港來來去去就係金融及地產兩味咁單調喎。

冇計喇，香港最大問題就係經濟發展欠缺新動力，年輕人出路狹窄，睇吓每年嘅文憑試狀元一窩蜂爭讀醫科咪知囉，做唔成專業人士咯喎，又冇本事炒樓炒股咯喎，想向上流動簡直難過登天，你話後生仔有乜法子唔悲觀吖。試諗吓，香港百物騰貴，就算有夢想創業都唔容易，淨係租金已經嚇死人，難為特首林鄭月娥輕描淡寫，話青年問題全世界都係一樣喎，弊在人哋有機會改變，有夢想可追，香港冇呢。

講到呢度，又諗起城中某富二代指摘年輕人一年去幾次日本旅行，所以買唔起樓，呢啲咪係典型嘅倒果為因囉。正所謂，有頭髮邊個想做瘌痢，如果去少幾次旅行真係買到樓，肯定冇人去旅行都似，但現實係買一個豆腐膶咁細嘅單位，都要唔飲唔食十八年先至達成，年輕人心灰意冷，今朝有酒今朝醉就係咁解。

今時唔同往日嘞，以前獅子山下嘅香港，連穿膠花嘅基層都有機會發達，家陣早就冇咗呢支歌仔唱，反而港人過去最睇唔起嘅內地就事事超前，愈做愈起，再次應驗風水輪流轉嘅道理。港府話就話協助年輕人置業，仲吹到天花龍鳳添，但如果經濟結構繼續死估估，向上流動階梯繼續阻塞，都係治標唔治本嘅咋。