功夫茶：查資產雙重標準　長生津製造矛盾

美國學者斯托弗曾經提出「相對剝奪感」嘅概念，大意係指啲人將自身處境同某種標準或某種參照物相比較，而發現自己處於劣勢，就會產生消極情緒。講完一大輪即係點？咪即係孔夫子所講嘅「不患寡而患不均」咯！所以話中國傳統智慧博大精深，幾時都冇講錯。

閒話表過，言歸正傳。話說高額長者生活津貼六月正式實施，合資格長者每月可獲三千多元，比現時「普通長生津」多近九百元，並且可以追溯至去年五月，補番十三個月合共一萬一千元嘅差額。每個月多成千銀使，對基層長者嚟講不無小補，原本好事一樁，可惜當局喺資產審查上大搞雙重標準，結果搞到怨聲載道，簡直唔衰攞來衰！

政府建議，將來參與「終身年金計劃」嘅長者，投保金額可以豁免計算為資產，只有每月固定嘅年金先會計算為入息，但仍合資格領取高額長生津。有團體批評，咁樣做等同鼓勵長者轉移資產，造成雙重福利，質疑點解同一筆資產，長者自留積蓄無法申請高額長生津，反而參與年金計劃就可以申領。舉個例子，有長者投資一百萬元落年金，每月獲近六千元固定回報，仍然低過單身人士入息限額，高額長生津照領可也，你話基層長者唔嘈到拆天就假！

呢嗱，呢啲咪不患寡而患不均囉！港府推出「年金」計劃，已經畀人話為有錢人錦上添花，事關除咗年金計劃，無論係「銀色債券」、「富貴長者屋」抑或「安老按揭計劃」，對冇私人樓同埋冇幾個閒錢嘅長者而言，都只能得個恨字。講開港府「還富於富」，不能不提今年財政預算案「補漏拾遺」，有人退稅退成過億元，真係唔到你唔服。

最弊嘅係，富貴長者都唔一定領情，事關年金投資回本需時，唔少人選擇自留資金留畀後代，當局豁免計算年金投保額，等於焗人上轎。

大家睇到啦，政府搞咁多嘢，結果只會挑動長者之間嘅階級矛盾，添煩添亂。老實講，港府如果真係敬老，使乜咁斤斤計較算死草吖，乾脆好似家陣向七十歲以上長者發放生果金咁，一律免入息及資產審查，皆大歡喜。不過嘥氣啦，民間要求港府推全民退保，講緊都係咁上下金額，特衰政府睬你都有味。所以話啫，唔係市民憎人富貴，而係港府太過涼薄。今時今日基層長者境況堪憐，唔想向政府乞米咁乞嗰幾千銀，惟有繼續拋個身出嚟執紙皮揸的士做看更，簡直係香港呢個富裕社會之恥。

始終都係嗰句︰針唔拮到肉唔知痛。高官一個二個薪高糧準福利多，退休後飲紅酒睇法國電影，無後顧之憂，理鬼你一般長者死活咩！