功夫茶:黃袍馬褂不管用 打狼即係辱主人

20180417
東網電視
更多新聞短片

過去皇帝常賜大臣黃袍馬褂,既係臣下嘅榮耀,亦係護身符,話係鐵券丹書都得,事關邊個敢侮辱黃袍馬褂,即係同皇上過唔去,死罪!可惜吖,喺香港呢個九反之地,黃袍馬褂唔止保護唔到人,反而可能害到人添,唔信嘅,睇吓人稱「狼英」嘅前特首梁振英畀人追殺到狼狽不堪,有氣冇碇抖咪知囉。

梁振英上台之初被揭UGL事件,授人以柄,搞到周身蟻。本來嘞,人走茶涼,梁振英做完一任就退下,以為UGL事件都一筆勾銷喇,點不知反對派唔單止冇放過佢,仲落多兩錢重。佢哋早前搞眾籌告梁振英,結果唔使一個禮拜就完成籌款二百萬嘅目標,下一步就係喺香港同英國等地分頭追殺,就算梁振英出律師信都阻止唔到,堂堂全國政協副主席淪為被告,要出出入入法庭,唔止佢本人有排煩,成個建制派都被摑一巴,連中央都面目無光吖。

話時話,梁振英假假哋都係「副國級」喎,點解反對派唔驚佢仲要搞佢呢?事實係,如果梁振英係裸退,變成一介平民,反對派或者可能對佢失去興趣,偏偏北大人要特別關照佢,以為賜佢一件黃袍馬褂,成為國家嘅人,香港嘅法律就奈佢唔何,點不知好心做咗壞事嘞。對反對派嚟講,呢件黃袍馬褂就好似蜜蜂見到蔗糖,鯊魚聞到血腥,老鼠發現大米,公牛撞正紅布咁,腎上腺素即刻上升,死死追住唔放。用句成語嚟講,就係「項莊舞劍,意在沛公」,反對派打擊副國級嘅梁振英,即係落中央嘅面,一舉兩得,何樂而不為吖!

試諗吓,梁振英平時着住西裝上立法會,畀人掟文件、掟茶杯,其實冇乜大不了,但家陣反對派係追住件黃袍馬褂掟番茄、掟垃圾、吐口水,咁就意義唔同。最可悲係,睇住梁振英被追殺、中央被侮辱,成個建制派竟然全部做晒植物人,冇乜反應,「扮聾」、「扮盲」又「詐瞓」,咁多年嚟阿爺全力為建制派拉票配票,扶呢班阿斗上位,到頭來發現根本靠唔住,話唔失望就假咯。

話時話,反對派陣營背後既有外部勢力操縱,又有漢奸黎等「四人幫」策劃於密室,眾志成城,進退有度,唔知幾咁團結,幾咁有戰鬥力。反觀建制派陣營就一盤散沙,勾心鬥角,有人話建制派係「群蟲無首」,簡直一針見血。講真,建制派點止無頭無腦吖,更加係無眼無耳、無心無肺,淨係得把口嘅咋。睇吓早排戴耀廷走去台灣宣獨,仲要勾結「五獨亂華」添,點知阿爺吹雞之下,建制派噏兩句當譴責又收工,你以為口水真係可以浸死港獨分子咩!

係囉,前日香港首次舉行全民國家安全教育日研討會,講到明唔容許顛覆國家主權、搞分裂,點解班建制派唔搞眾籌,聘請英國皇家御用嘅金牙大狀告埋戴妖同漢奸黎,幫阿爺攞番個彩呢?