功夫茶：疫苗缺貨亂象多　港府懶理必埋禍

香港出名「生老病死皆不易，衣食住行樣樣難」。呢，最近多種疫苗缺貨，搞到爭崩頭，咪體現到乜嘢叫做生老病死皆不易囉。好似子宮頸癌疫苗咁吖，因為求過於供，終於搞到「爆煲」，唔止香港人冇得打，連內地人有錢都打唔到，都唔知點收科。

咪睇香港競爭力每況愈下呀，實際上爛船仍有三斤釘，近年唔少內地人鍾意南下香港「打針」，就係貪香港醫療水平較內地高，疫苗較齊全。本來呢，私家醫生對呢條財路無任歡迎，但正因為人太多，加上本地需求又大，終於搞到疫苗供不應求。

好似本報就接獲內地婦女投訴旺角某醫療中心涉嫌欺騙，原來佢哋一早畀咗六千幾蚊人仔打子宮頸癌疫苗，但只獲安排注射第一針，醫療中心就以藥廠斷貨為由，唔再安排佢哋注射餘下兩針。你知喇，子宮頸癌疫苗必須於一年內打齊三針，否則無效，家陣半天吊咁，唔呱呱嘈就奇。仲有呀，部分內地婦女聲稱被本港中介公司坐地起價，向消委會投訴不果，於是喺微信開設群組召集苦主集體來港維權，估計人數過千，都咪話唔手尾長。

講真，消費者爭取合理權益絕對值得支持，不過佢哋鬧爆中介公司同醫療中心之餘，最好順道幫香港人鬧埋特衰政府，事關就係呢班庸官對疫苗嘅前瞻性不足，至會出現家陣疫苗分配錯漏百出甚至斷貨嘅局面，內地人應該去向呢班庸官抗議，圍住佢哋唱國歌，幫香港人出聲，等班廢官知道自己有幾廢吖。

點解咁講？好簡單，疫苗不足已經唔係第一次發生，好似早前流感肆虐，偏偏衞生署估錯數，入貨數量嚴重不足，卒之搞到天下大亂，死得人多。當時私家醫生團體已嚴正要求港府及早做好疫苗規劃，唔好再倒瀉籮蟹，言猶在耳啫，疫苗斷貨又再上演，你話港府唔係冇神經、冇靈魂係乜吖？

再講吖，淨係港府冇政策確保「港人優先」已經抵鬧喇。唔係話要挑起中港矛盾，而係內地實在人多勢眾，大型醫療中心為咗做生意，幾乎壟斷大部分疫苗畀內地客專享，普通家庭診所根本攞唔到針，港人打針動輒排期半年。港府一味以自由市場做擋箭牌，對亂象視若無睹，簡直豈有此理，立法會議員要求當局喺分配針藥上實施港人優先，絕對唔係無的放矢(口架)。

唔係嚇你，隨住中港交流日趨頻繁，好多新型病毒就係咁傳來傳去，港府連供應足夠疫苗畀市民都做唔到，加上公營醫療亂象多多，類似沙士嘅災難會唔會重臨，真係冇人講得埋。