功夫茶：區會殺街順民意　最怕治標唔治本

「甲之良藥，乙之砒霜」，用嚟形容旺角行人專用區就適合不過嘞。對於街頭表演者嚟講，呢度既有粉絲支持，又有可觀打賞，簡直好到不得了，之不過對於街坊嚟講就耳膜受罪咯，噪音污染令佢哋冇覺好瞓，受盡折磨，之所以「殺街」消息一出啫，街坊拍爛手掌，高呼：「超贊成！」就係咁解。

嗱，油尖旺區議會日前大比數通過終止西洋菜街行人專用區試驗計劃，即係話呢個有十八年歷史嘅「港版步行者天國」即將壽終正寢。有區議員毫不留情直斥專用區「烏煙瘴氣」、「神憎鬼厭」，話噪音唔止嘈到居民唔敢返屋企，連附近舖頭職員都要戴耳塞返工，苦不堪言，當年有份撐專用區嘅區議員仲鞠躬道歉添。

講真，運輸署當年推出行人專用區嘅原意唔錯㗎，既可開發城市公共空間，又可減輕車輛帶嚟嘅污染，點知後來陸續集結五湖四海嘅街頭表演者，大叔大媽肆無忌憚展示歌藝舞姿，搞到專用區變成榕樹頭賣唱地咁，變質變味。最慘係部分街頭表演者連業餘資格都談唔上，唔理好醜擘大喉嚨獻醜，分分鐘嘈過地盤打樁。呢，舊年有化妝品店整咗個隔音屏障，諗住隔一隔啲噪音，點知屋宇署不分青紅皂白，竟然要求拆咗佢，簡直豈有此理。旺角居民被迫對住呢啲「音」功都咪話唔陰功，難怪聽到殺街消息鬼咁興奮啦。

問題係，當局殺完街之後係咪一了百了呢？斷人衣食，猶如殺人父母，呢班街頭表演者一直喺專用區搵食，好景起上嚟，唱首歌都可以收三千蚊打賞，突然被斷米路喎，唔嘈到拆天至奇。仲有喎，其他地方一樣有行人專用區，呢班人會唔會殺去第二個地頭搵食，冇人講得埋，到時一樣有第二班街坊耳膜受罪嘅咋。有人就建議當局另外物色地方畀佢哋表演兼發牌規管，之但係香港寸金尺土，地從何來呢？連表演場地都唔夠，發牌咪即係盞搞。

講到尾，港府搞個行人專用區出嚟就關人個關，由佢自生自滅，以為將外國步行街生搬硬套就萬事大吉，冇規劃冇王管咯喎，點會唔亂象叢生吖。真係諗極唔明，明明行人專用區係利民措施，搞得好仲可以成為特色文化景點，台灣、日本、歐美都有成功例子，偏偏港府連拿來主義都唔識做，呢啲咪叫橘越淮而枳囉。

冇計喇，港府大事做不成，小事做不來，亂七八糟嘅又點止行人專用區吖，上至十大基建之一嘅郵輪碼頭，下至毫不複雜嘅美食車，冇一瓣唔係搞到變成爛攤子，失敗收場，香港喺一班廢官把持下，點會有運行吖。