功夫茶:水盆底下開病床 醫療點止人手荒

2018年06月14日 00:04
東網電視
更多新聞短片

林鄭早前好風騷咁話,做咗特首近一年,有「度月如日」嘅感覺,事關佢覺得每日都好享受同好輕鬆喎。佢就輕鬆得過咯,唔該睇吓公院病人喪失尊嚴嘅住院苦況先喇,佢哋點止度日如年,直情係度分如年、度秒如年呀。

嗱,一名患白血病嘅前醫護人員最近喺社交網站向林鄭寫咗封公開信,控訴港府麻木不仁,病人尊嚴何在。原來佢喺醫院病榻上目睹好多唔合理嘅怪現象,病人理應得到適當照顧,但事與願違,好似同房有兩個年輕女病人,因為治療而半禿咗頭,嘔吐大作,但只可蜷曲喺臨時病床上苟延殘喘,一個瞓走廊,另一個瞓洗手盆底,連一個安頓嘅位置都冇,淪為難民,尊嚴掃地,慨嘆港府坐擁千億盈餘仍然對病人苦況視若無睹,令佢「痛心疾首」咁話。

冇錯嘞,本港公立醫院亂象五花八門,層出不窮,病人有苦自己知。淨係每年流感高峰期,公院例必倒瀉籮蟹,病房逼爆,一床難求,人手仲極度短缺,玩吓手病人要瞓廁所門口都似。都仲未計開錯腦、斷錯症、打錯針、畀錯藥、輸錯血呢啲匪夷所思嘅醫療事故,病人一隻腳踏入公院,另一隻腳踏入鬼門關,仲講乜嘢病人尊嚴吖,執番條命仔已經算好彩嘞。

真係諗極唔明,你話港府如果好似委內瑞拉政府咁幾乎破產,就話對醫療亂象無能為力啫,但港府乜都缺,就係唔缺錢。既然有錢好辦事,點解唔肯投入更多資源搞好公營醫療造福市民呢?點解要病人喺生死關頭仍要毫無尊嚴咁過日子呢?講來講去,咪就係善財難捨,冤枉甘心囉。

唔使講其他,淨係睇吓港府點樣對待假難民就一清二楚。港府今年用於假難民嘅開支高達十四億元,五年就燒咗五十億元公帑,而且好心冇好報,假難民淪為禍港殃民嘅治安毒瘤。反觀用喺公營醫療方面就斤斤計較,仲成日想將個波踢畀私人市場,搞埋晒啲所謂「自願醫保」,對假難民仁慈,對市民殘忍,手指拗出唔拗入!

最荒謬嘅係,上屆政府提出二千億元十年整體醫院發展計劃,又話要加開五千張病床,又話要增加九十個手術室,吹到天花龍鳳,但到依家都係得個吉,到底咁大舊錢去咗邊先?好似天水圍醫院咁,連急症室都做唔到廿四小時,公院人手荒、病床荒、土地荒嘅問題愈演愈烈,證明港府假仁假義,吹水唔抹嘴。

香港就係咁諷刺嘅嘞,病人淪為難民,假難民變成上賓,唔到你唔服。一句到尾,有錢有尊嚴,冇錢冇尊嚴,呢個就係香港嘅現實,林鄭呢啲度月如日嘅上等人,又點會明白基層病人幾咁淒涼吖。