功夫茶：土地小組爆混亂　辯論恐淪吹水會

土地供應專責小組尋日舉行首場公眾論壇，結果櫈都未坐暖就有多個團體率領大軍踩場，佢哋又拉橫額又嗌口號，擾攘一輪，簡直亂過亂世佳人。咪畀人睇死，土地議題爭議多多，加上某啲政客要做騷刷存在感，類似一幕肯定陸續有來！

講到呢度，功夫茶不期然諗起「唔怕你精，唔怕你呆，最怕你唔來」呢句說話。咪睇大會出動保安趕示威者出場，懶係驚人阻住地球轉咁款，其實內心可能多謝緊呢班免費茄哩啡。如果唔係佢哋「撐場」，又點凸顯到社會意見紛紜，將來一事無成又有咩好賴？

唔使講第樣，淨係收番粉嶺高爾夫球場已經有排拗。支持者認為場地面積大，地契又就嚟屆滿，正好釋出土地興建大量公屋單位；反對者就擔心影響從業員飯碗，雙方猶如兩小兒辯日，嘈到天光都唔會有結果。至弊係專責小組提出畀公眾辯論嘅其他建議，包括填海、發展郊野公園用地以至填平船灣淡水湖等，一個比一個「惹火」，有人擔心所謂大辯論最終只會淪為「吹水會」，拖得兩拖特首夠鐘收工，最終又係留低蘇州屎畀下一任，唔係冇道理㗎！

冇計喇，港產官僚開口埋口「寸土必爭」、「見縫插針」，可惜講就天下無敵，做就有心無力，既擺唔平既得利益者，遇到反對聲音亦只會腳軟跪低，惟有一味玩拖字訣，研究復研究，諮詢復諮詢，到頭嚟又係得個吉。退一萬步講，即使土地小組真係凝聚到社會共識，如果港府一早有既定立場，淨係當小組轎夫咁使，咁就講乜都嘥氣。好似全民退保咁吖，明明港府day one就冇諗過要搞，但又整色整水委任學者研究方案，結果港府反轉豬肚，老教授慘被擺上枱，土地小組會唔會重蹈覆轍，大家只有放長雙眼?實。

大家有眼見，港府為推卸拓土不力責任，唔係玩拖字訣就係挑動市民鬥市民，自己翹埋雙手坐山觀虎鬥。收回高球場固然涉及貧富矛盾，之前有市民入稟法院申請司法覆核，挑戰房委會公屋配額及計分制年齡歧視，對非長者單身人士唔公平，房委會居然靠嚇，話一旦敗訴市民平均輪候時間勢必愈拖愈長，潛台詞即係有人「搞事」，上唔到樓嘅唔該搵佢哋算帳。

始終都係嗰句，講一千句漂亮話，不如做一件實事。新加坡面積細過香港，人口密度高過香港，人均居住面積卻足足係香港嘅兩倍，邊個「好打得」，邊個「好talk得」，畫公仔唔使畫出腸。林鄭既然口口聲聲香港缺嘅唔係土地，而係「一個土地共識」，不妨身先士卒，將禮賓府騰出嚟大庇天下寒士，社會肯定冇爭議！