功夫茶：一國唔理兩制唔掂　港獨猖獗港府腳軟

香港特別行政區，「特別」喺邊度？就係蛇蟲鼠蟻、蒼蠅曱甴特別多囉。大家有眼睇，港獨猖獗，漢奸橫行，洋奴得戚，成個香港烏煙瘴氣，蛇鼠一窩，七國咁亂，如果唔係主人懶懶閒乜都唔理，搵着個管家又廢柴怕事，好哋哋一塊福地又點會淪落成咁吖！

嗱，尋日保安局局長李家超大大聲話，按警方助理社團事務主任建議，考慮禁止「香港民族黨」嘅運作喎。香港民族黨係乜東東？之唔係佔中之後湧現嘅其中一個港獨組織囉，唔止打正旗號鼓吹香港民族自主、獨立建國，召集人陳浩天仲同青年新政等本土派同氣連枝，隔三差五走去海外播獨，搞到「五獨齊發」就係咁解。

好明顯嘞，呢個港獨組織違反《基本法》同「一國兩制」，仲分分鐘違反《刑事罪行條例》，咁都高調玩咗兩年幾，話港府唔係姑息養奸都冇人信喇。最好笑係，當局懶義正詞嚴咁批評民族黨損害國家安全，實情係鱷魚頭老襯底咋，既唔敢拉人封艇，仲要畀夠廿一日時間申辯，最怕搞多兩搞，人哋同港府對簿公堂兼贏埋官司，咁就?爆。

咪以為冇可能呀，司法不嬲係反對派最強武器，專門保護反中亂港集團，家陣港府出咗聲取締港獨團體，外部勢力仲唔搞你咩。係人都知，港府出名恐洋懼外，廿三條立法又束之高閣，到時唔跪低至奇。最匪夷所思嘅係，港府唔係旗幟鮮明反港獨，而係借「警方助理社團事務主任」嘅名義過橋，情況相當於以選舉事務主任名義DQ立法會參選人，名不正言不順，理不直氣不壯。咁就難怪民族黨變本加厲，高調呼籲同道中人「及早建立對中國人同港共政權嘅敵對意識」，擺明唔放港府喺眼內。

點解香港會搞到「漢奸走狗神枱貓，老鼠毒蟲齊出洞」咁折墮？一句到尾就係「一國唔理，兩制唔掂」惹嘅禍。中央錯將五十年不變當成五十年不管，兩制淪為姑息養奸嘅擋箭牌，你話嘞，連對住民族黨呢啲茄喱啡都畏首畏尾，抵死成咁，心虛成咁，有洋人護駕嘅黑金金主、佔中搞手、恐嚇記者踐踏新聞自由嘅漢奸黎至今逍遙法外，又有乜出奇吖。有人形容「一國兩制」好比一間屋分成兩半，一邊打掃得企企理理，另一邊任由蒼蠅亂飛，曱甴亂爬，唔係冇道理㗎。

一百年前，中國貧窮落後，魯迅「哀其不幸，怒其不爭」係情有可原，諗唔到今時今日「大國崛起」，中國依然畏洋如虎，正義之士依然哀莫大於心死。回歸廿一年嘞，香港喺一國兩制之下依然要玩貓捉老鼠嘅把戲，反中亂港集團依然聲大夾惡，既然冇信心管好香港，不如索性將香港交番畀洋人管，一了百了咪好囉。