笑看天下:港鐵沉淪的啟示-施友朋 評論員

2018年08月12日 00:04
東網電視
更多新聞短片

港鐵沙中線工程造假醜聞愈揭愈有,更愈揭愈臭,當真是一臭未冚一臭又起。早前捲入「削牆」醜聞嘅土瓜灣站,再被踢爆附近有二十多幢建築物沉降數值超標,港鐵竟然「沉降浮眼過,佛在心中坐」,當冇事發生,沒有叫停。而會展站繼早前爆出挖掘工程少放臨時橫向支撐、工程人員涉標示出錯,令兩幅連續牆的主力面裝錯方向後,近日再爆出該站地盤有十四個監測點沉降超標。至此,港鐵冇辦法唔表示為釋除公眾疑慮,暫停會展站所有挖掘工程。沙中線究竟仲有幾多醜聞未被踢爆,真係天曉得!

港鐵今日嘅沉淪,可以說是政府管治無能、冇心冇肺、冇神經冇靈魂種下嘅「惡果」,高官一個個淨係識卸責,最好笑係嗰位運房局局長陳帆,被問到是否需要為此醜聞問責落台,佢竟然如夢囈般的說:政府團隊表現有目共睹。

阿哥,市民大眾有目共睹嘅係整條沙中線都有可能涉及造假,如果再讓港鐵狡辯甚麼「監察點數據涉大廈沉降屬私隱不宜公開」,繼續廢噏,咁港鐵嘅管治誠信破產,政府顏面亦不存矣!曾幾何時,香港嘅競爭力排名位居世界前列,其中一個原因就係基建快靚正,但如今都隨港鐵的造假醜聞而被雨打風吹去!

港鐵固然一錯再錯且愈錯愈曲折離奇,然而它「大到不能倒」,這怪胎是誰縱出來的?港鐵沒有吸取過去的種種教訓,不徹底改革,最終變成結構性潰爛,且爛到入骨入肉,政府的管治無能真係有目共睹。

見微知著,政府諸事議而不決,法治淪落,司法不公,最簡單不過的例子就係漢奸黎在眾目睽睽下辱罵及刑恐東方報業集團記者,證據確鑿,但律政司喺「有目共睹」下依然「心無罣礙」,扮睇唔到!政府養着一班廢官,不「猛藥去疴,刮骨療毒」,還夠膽厚着臉皮說自己「負責任、有承擔」?