功夫茶:鼓勵中老就業 推卸安老責任

2018年09月17日 00:04
東網電視
更多新聞短片

阿里巴巴集團始創人馬雲早前宣布出年就退休,被俄羅斯總統普京問佢搞乜五十幾歲就退休,仲話自己六十幾歲都未退休啦。其實幾時退休因人而異,不過特衰政府一心想推卸安老責任,於是就諗計鼓勵人延遲退休,就認真可惡呀。

呢,勞福局局長羅致光尋日喺網誌發功,話社會係時候鼓勵僱主延長員工退休年齡,佢仲話由八十年代開始,年過六十至六十四歲嘅男女勞動參與率明顯下降,去到二○○四年至上升番,話係政府實施法定最低工資,令基層員工薪酬得到改善得出嚟嘅結果喎。家陣特衰政府就再做多一次「善舉」,等大家可以延遲退休嘞。

講真,咪以為羅局長主動為班年長打工仔發聲,又搬出勞動人口喺未來會愈來愈緊張咁,實際上講嚟講去,政府只係想逃避安老呢個大包袱,於是整色整水,最好社會上嗰班「登六」人口可以留番喺職場愈耐愈好。正如羅局長嘅網誌度鬼拍後尾枕話齋,「退休年齡」其實就係指領取退休福利嘅年齡,年長人口遲啲退休,政府就可以慳番一大筆,政府為自己荷包設想,梗係吹行延遲退休呢壇嘢啦。

不過咁喎,政府落足嘴頭,但係就得個講字,除咗啲過氣高官有得無限翻閹外,根本就唔會帶頭聘請「中老」、「少老」打工。政府識得靈活變通,商界何嘗唔曉得陽奉陰違?若果政府旨意每月發放幾千蚊在職培訓津貼,為期半年至一年,就可以令商界落疊,實在係睇小咗僱主會攞完津貼,就將長者用完即棄、炒魷魚嘅行動力。

真係諗極唔明,港府作為世上數一數二嘅有米政府,大型基建隨隨便便都掟幾十億落鹹水海,但係花少少錢搞安老就好似要割忽肉出嚟咁,唔止講明唔會降低各項長者津貼嘅申請門檻,仲要掉番轉頭話長遠應該上調領取福利年齡添,有高官仲自爆庫房啲錢係用嚟支付公務員嘅退休金,只有官至可退而無憂,小市民就要食自己。呢個政府善財難捨,冤枉甘心,都可以話係冷血涼薄嘅人辦。

講到尾,香港唔少人七老八十仲要做,揸的士、揸小巴,甚至執紙皮,唔係為咗日曬雨淋貪過癮,係窮咋!鬼叫政府安老政策唔掂,調查仲話港人長壽冠全球,平均八十歲起碼,只靠個人積蓄同強積金雞碎咁多錢,玩吓手就搣晒,惟有焗住幾十歲人都要繼續做,點敢輕易言休呀?

冇計喇,喺特衰政府嘅無能領導下,高官就只識殘民自肥,港人準時交稅,到頭來乜安老福利保障都冇,想唔拋個身出嚟做都唔得啦。