功夫茶：後顧之憂未解決　取消對沖也枉然

係人都知，特首林鄭月娥上任以來政績乏善可陳，唔止打擊港獨放軟手腳，就連風災善後都倒瀉籮蟹，民望仲好似食咗瀉藥咁一洩如注添。嗱，現屆政府第二份施政報告即將發表，唔搵啲「亮點」轉移視線，你估林鄭唔驚畀阿爺詐型咩，所以呢，講咗十世嘅取消強積金對沖，十畫終於有一撇嘞。

最近政府放風，話行會通過取消強積金對沖劃線方案，延長政府對僱主補貼期至廿五年，補貼金額亦會由原來一百七十二億元勁增至近三百億元，聽聞資方對呢個方案比較接受，林鄭有望當成政績喺施政報告提出。講真，取消強積金對沖由上屆講到今屆，勞資雙方一直雞同鴨講，今次資方之所以收貨，無非係港府大慷納稅人之慨，既大幅延長補貼期，又大手筆加碼補貼，即係用公帑買政績咋。

冇計嘞，港府根本無法擺平商界，偏要擺出為民請命嘅模樣，咁港府有的是錢，惟有花錢買平安囉。不過咁，商界雖然話呢個方案體現港府有承擔，但其實一樣錙銖必較，要求補貼百分比要劃一為百分之五十，又建議喺補貼期內，專項儲蓄戶口若不足以支付遣散費或長期服務金，政府要包底喎。所以話，逐利係商人本性，方案細節最終係點，仲要睇過至知。

講開強積金，真係一殼眼淚。唔止蝕多賺少，手續費高昂，就算取消對沖亦不過小修小補，不足以安享晚年。講到尾，要讓打工仔過有尊嚴嘅退休生活，全民退保係不二之選，可惜吖，港府善財難捨，一時以結構性財赤恐嚇市民，一時挑撥窮人鬥富人、青年鬥長者，總之就係將全民退保妖魔化，林鄭仲同研究退保嘅資深學者隔空駁火，簡直唔知醜字點寫。港府明益金融界，畫公仔唔使畫出腸喇。

最可笑係，面對人口老化加劇，安老問題迫在眉睫，高官唔係未雨綢繆，反而大玩拖字訣，一味以富貴長者屋、銀色債券同埋年金搪塞，只知錦上添花，拒絕雪中送炭，結果反應冷淡，形同虛設。搞到冇嘢好搞，仲噏埋「少老」、「年長人士」等名堂，要求社會延長退休年齡，但就全無配套支持。你話喇，今時今日除咗過氣高官能夠無限翻閹，又有幾多僱主願意聘請長者吖，連港府都冇帶頭做好榜樣，資方當然睬你都傻。

呢個政府就係咁嘅嘞，將百億千億公帑興建大白象工程，天經地義；將每年十幾億公帑倒貼無惡不作嘅假難民，甘之如貽；一講到搞好醫療、安老及退保咯喎，耍手擰頭唯恐不及。堅離地高官不理民間疾苦，只知自吹自擂，認屎認屁，公公婆婆想安享晚年，真係唔使旨意。