功夫茶：偷渡潮死灰復燃　堵誘因方能治本

古人曰︰以地事秦猶抱薪救火，薪不盡，則火不滅。查實假難民問題都係一樣，唔杜絕班瘟神來港掘金嘅誘因，無論港府增加幾多資源人手，始終都係治標不治本。

粵港兩地執法部門日前展開聯合行動，成功瓦解一個協助人蛇經內地偷渡來港嘅集團，拘捕二十多人，包括多名集團骨幹以及來港做黑工嘅越南假難民。據警方表示，人蛇集團分工精細，收取一萬銀費用將人蛇運抵香港之後，蛇頭會安排佢哋到市區匿藏，再一條龍收多千五銀偽造身份證費用，之後人蛇就可以安心搵真銀。

冇錯，喺中港兩地加強打擊掃盪之下，偷渡潮一度有所收斂，問題係蝕本生意冇人做，殺頭生意有人做，好似上述越南人蛇偷渡集團咁，咪睇每位收一萬港元唔係咩大數目，但多啲嚟密啲手，山大斬埋有柴；而且成本超低，一條爛鬼舢舨就夠膽死起錨，連最基本嘅救生衣都慳番，如果走非洲等較遠水路嘅路線，食水就更加深。再講吖，蛇有蛇路，鼠有鼠路，唔少蛇頭本身都係假難民，你拉佢坐監喎，反正裏面有食有住有人工，佢咪當度番個悠長假期咯。

始終都係呢句︰香港幾好都有，假難民點捨得走。大家有眼見，假難民只要到埗後舉手提出免遣返聲請，一張「行街紙」在手，等同領取犯罪通行證，打黑工已經算係「安分守己」，更多假難民走去幫黑社會睇場劈友，甚至持械打劫珠寶金行，再唔係就印假銀紙製假信用卡。就尋日之嘛，又有兩名南亞幫喺深水埗藏毒斷正嘞。講起深水埗，市民真係一殼眼淚，除咗通州街天橋底淪為生人勿近嘅「南亞村」罪惡淵藪，附近嘅「南亞七街」亦早被假難民攻陷，加埋對面海嘅蘭桂坊「人間妖域」以至新界元朗等地區，南亞幫勢力遍布港九新界，有人話香港遲早要改名「南亞特別行政區」，絕對冇誇張。

功夫茶講到口水都乾嘞，要徹底解決假難民問題，最乾手淨腳莫過於退出國際公約，之後學內地、澳門同台灣咁實行即捕即解，一時做唔到，最低限度都應該廢除行街紙制度，復設禁閉式難民營，還市民清淨日子之餘，斷絕班假難民嘅米路。事實證明，一味小修小補，靠加快甄別程序送走班瘟神，根本無濟於事，事關你有張良計，佢有過牆梯，淨係同你玩司法程序，分分鐘都拖個十年八載，用嘅仲要係市民嘅血汗錢，簡直吹脹。

官老爺開口埋口講「國際標準」，依家美國對非法入境者零容忍，澳洲喺離島設禁閉營，意大利直頭閉門謝客，港府幾時至肯「接軌」吖！