馬國明陪溝女賺人仔

近日忙於在上海拍攝成龍投資電影《緣來是遊戲》的馬國明，趕回港為劇集《On Call 36小時II》宣傳，他說：「套戲仲未拍晒，台慶前應該會搞掂。（角色多艷福？）唔係我，我只係陪男主角追女仔，冇感情線。（唔開心？）睇住有人仔（人民幣）就開心。（會上多啲大陸賺人仔？）公司好似收緊政策。（無綫講咗唔抗拒演員返內地拍劇。）咁咪好囉！不過我都唔想成日返大陸，一年一套加幾個廣告就夠。」

決戰Cool魔黃子華

談到他是今年視帝大熱，他即說：「聽講係Chilam（Cool魔張智霖）喎，其實仲有好多人，近排咁多劇，仲有嚟緊《My盛lady》o既黃子華都好勁，不過都好開心可以同Cool魔練過。（有信心攞視帝？）OK喇，平常心，盡力而為啦，有得同前輩爭下都開心，而且《衝上雲霄ll》同《On Call36小時ll》我都有份，如果有好成績我都好開心。」新劇將於8點半播出，而且《My盛lady》將緊接在9點半時段播放，問會否覺得輸蝕？他說：「都係（輸蝕），不過都係睇口碑，同網上睇番都OK，最緊要大家鍾意。」