周麗淇唔介意同鄭嘉穎拍親熱戲

周麗淇出席活動，被問有指與舊愛鄭嘉穎一同為無綫拍劇換取視后寶座？她否認其事：「我同TVB一向有約，不過出年就到期，但續約機會大。（係咪同鄭嘉穎合作？）我唔知同邊個合作，獎項隨緣啦！個個女藝人都有機會，因為每個人都有付出，而且咁大間機構唔會為咗一個人簽約而換獎囉！（如果同鄭嘉穎合作介唔介意？）哈哈哈，都咁多年啦！唔會介意，我唔會介意同邊個合作，只介意角色有冇得發揮。（如果大家演情侶有親熱戲呢？）咁呀？都係做嘢啫！（你同前度拍戲男友會否呷醋？）咁辣o既條問題？都唔係真o既，都係工作大家會明白。」