城城初戰東望洋啄尾炒車

台上歌精舞勁的「舞台王者」郭富城，台下化身「辣車城」，經常揸辣跑在賽道上較勁，他在《第60屆澳門格蘭披治大賽車》的奧迪R8 LMS盃排位賽大騷車技。

賽前信心十足的他，一大早就現身維修站試車，更吸引不少場內人士圍觀拍照。雖然被閃光燈「突襲」，不過城城仍Nice爆豎起拇指對鏡頭微笑，心情輕鬆。未知是否賽前突然被閃光燈騷擾，加上要與職業車手同場較技，「辣車城」一時心急輕撞對手車尾釀成意外，排名第14。

事後城城接受訪問，仍保持輕鬆心情，他解釋：「係小意外，人無嘢。當時架車喺髮夾彎轉入大直路時，想追前面架23號，以為可以過佢，不過當佢減速時，我又咁啱加速，所以錫一錫佢車尾，都唔算係真意外。（會否通知阿媽？）唔講啦，小事，唔想嚇親佢。」之後他大讚自己比熱身賽時快6秒，亦滿意表現：「今日個比賽入面，有12個係職業車手，自己都覺得滿意。」談及明天賽事，他坦言信心不大，但會繼續養精蓄銳，寄望正式比賽可打入業餘組三甲位置。

面對超強颱風的來臨，「辣車城」笑說：「會更刺激，最多還原基本步，慢番6秒。」不過當問戰車車身印有可口可樂的Logo時，曾為百事可樂任代言人的他刻意避談，拒絕回應提問。