張可頤人生如戲 享受單身

藝人張可頤首度亮相有線，為羅敏莊主持的《色香味主播室》節目擔任嘉賓，分享近況及講飲講食，回復自由身的她表示樂意與不同媒體合作。

2005年患上甲狀腺炎後，可頤更注重飲食，最重要是食得健康，會親手炮製花膠、多飲水來養顏保身，就連生活習慣亦較以往自然，多吃有機食物避免禍從口入，不過可頤曾經食過一種很古怪的食物：「我之前成日喺內地拍劇，當時佢哋請我食水曱甴，賣相真係唔吸引，不過我都敢試，其實食物唔一定要好矜貴，呢種地道食物亦好特別，加上食係其次，最重要係同至親o既家人、朋友一齊分享。」

可頤仍然保持單身生活，她覺得很自由，無拘無束：「我好享受演戲、感受唔同角色，好似行過咗不同人生，我最難忘係拍一部內地劇，拍時真係好辛苦，但我又好慶幸遇到呢個角色，如果將來可以再演類同盪氣迴腸故事，咁就無憾。」

談及新一屆視帝、視后引起不少爭議，可頤認為毋須介懷獎項，這是要配合天時、地利、人和各方面，獎項當然是演員一種鼓勵，獎勵過往付出的努力：「演員要有歷練自可以將角色發揮得淋漓盡致，靈魂、思想同步成長就可以演得絲絲入扣，如果只係停留一個層面，咁演o既角色永遠好表面、好膚淺，相反經歷多咗，就算一個表情、眼神，投射出嚟o既角色都係唔同。」