演協內訌：黃秋生若當選會長 誓踢走陳芷菁

演協自前會長曾志偉辭職後，黃秋生透露有意角逐，而且呼聲甚高，未料昨日選新會長時爆發內訌！昨早秋生與郭少芸、呂慧儀等現身觀塘演協會址，秋生起初還自信爆棚，笑言都想有對手，不需要拉票，還談到如何改革會務？說：「入會資格就有問題，會章似投資公司多過似協會，要改！」

說畢秋生率眾人上樓，但十分鐘後折返，秋生說：「唔畀我入去！」眾人再上樓嘗試，只見會址外貼有「是日會員大會，非會員禁內進」字句，秋生按鐘後有演協人士開門，但隨即閂門，秋生說：「你睇對同業幾冇禮貌、幾侮辱！好似神秘組織！」秋生愈說愈氣，一度欲將會章投進垃圾箱，他說：「話我唔係會員冇資格發表！咁我交番畀志偉，唔搞！搵我去組織，花咁多時間，搞成咁有乜意思？直情侮辱，企門口為乜？同業點解要搞到咁，呢個會究竟咩事？（同上屆理事傾唔掂？）話要審批喎！唔畀逗留。有人行過你門口嘔白泡，你都畀佢入去休息吓啦！」說罷即扮頭暈瞓地，但入面依然沒有理會。

排除另設新藝人組織

此時王祖藍步出會址，記者問他內裏情況，他面有難色說：「我問吓先，都係正常程序。」秋生則搞笑地掹着祖藍影相，並說：「我唔選啦，唔排除開個新會，搵各大元老，成龍、志偉等支持。（通知你但又唔畀入？）直情係留難我，根據會章可以即刻入會，好質疑有冇跟會章做囉，（同志偉反映？）唔關志偉事，係入面唔知邊個啫！唔搞啦，好似我好恨做咁，好火滾，開個新會，重新來過，乾乾淨淨。」

陳芷菁：係佢發脾氣

演協秘書長陳芷菁事後回應秋生指摘，她說：「協會一直有同佢溝通，選舉要申請做會員，要填表，批核要時間，雖然藝人熟口熟面，但每個人入會都要申請，TVB藝人要出示合約，批核可以好快、好慢，秋生一轉頭同郭少芸上去話想入會，係佢發脾氣話冇跟會章做嘢。如果即刻入會即做候選人，會被人話黑箱作業，對其他候選人公平啲！（秋生稱唔係會員冇權發表？）昨晚秋生有同協會律師通電話，絕對唔係冇機會討論。（邊個通知秋生來？）唔知，我冇！」昨日選新會長最終流會，不歡而散，被問到誰叫流會？她說：「係一致決定，我哋從未試過流會。」她又謂不介意秋生另立新組織。

連累支持者 感抱歉

秋生昨晚重申表示根據會章，可以即時交表即時入會，說：「我問係咪跟會章？就刁難人要攞份合約出嚟，咁搞係冇事搞事，不如懷疑我係咪香港人啦！我問係咪跟會章做事，就話唔講呢啲，咁講咩？想同我談情？（心灰？）我唔會為弄權者而冇咗為演藝人謀福利o既機會，我懷疑會章大定某一兩個人大？」秋生繼向同吃閉門羮的藝人感抱歉，他說：「我哋個個都有嘢做，好得閒咩？咁侮辱性不禮貌o既對待，我都好唔好意思，請咗班藝人朋友來到，被當乞衣咁嚟看待，我哋十幾廿個真係可以組織番個『醬油會』，我選唔選到唔緊要，又唔係受薪，就等佢哋解決咗啲內部矛盾先。」

秋生又指是否參與本月23日選舉仍屬未知數，首先必需先交待今次事件，被問到若選到做會長，如何協調新舊派通力合作？他說：「我起初都叫芷菁留低，但依家唔好搞啦，佢合唔到人，處事不恰當，如果第時代表個會出去同其他單位、機構洽談，咁倨傲點傾？（志偉同你通咗電話？）冇，慢慢吖，搞度就搞，好多人都勸我唔好做，諗住拋個心出嚟，點知遇不禮貌對待，行家都係咁，何況外人？」