謝霆鋒讚伍允龍打得：揪低我幾條街

功夫影星伍允龍（Philip）首次擔正的電影《惡戰》今日上映，一段有關Philip的紀錄片曝光，好友謝霆鋒、安志杰、吳建豪、導演王晶、黃精甫及武術指導袁和平大談對Philip的看法。

霆鋒表示兩人因拍詠春劇成為好友，其後拜對方為師學詠春，霆鋒大讚伍允龍教功夫時很仔細，但在片場往往欠缺信心，他說：「我帶佢見多啲導演，喺現場對打多啲，畀人睇到佢原來可以揪低霆鋒幾條街架喎！幫佢提升自信。」

兩人在片中還大談半夜練功的趣事，Philip形容「兩條麻甩佬」只穿上孖煙囪練步法，因太嘈吵引來鄰居拍門，惟當時霆鋒搞笑地扮不知情，更反嚇該名鄰居謂：「『沒有呀！你聽到甚麼聲音嗎？』擺明我哋係打交，又或者做曖昧o既啦！」二人更笑指事後該名鄰居應該搬走了。