黃宗澤自爆畀智叔搞到「扯蝦」

藝人黃宗澤（Bosco）晚上出席電影《男人唔可以窮》煞科宴，鄧麗欣（Stephy）在戲中飾演他的前女友，最後黃宗澤會與趙榮結婚，問有否親熱戲？他說：「真係唔多，到最後得一場同趙榮錫咗啖，因為呢套唔算愛情片，係講個男仔點長大為男人，我覺得幾勵志，冇乜拍過呢類型戲。」

畀廖啟智KO咗

他坦言最開心與廖啟智（智叔）合作：「佢公認好戲，有兩場喊戲真係畀智叔搞到收唔到聲，Cut咗機重喺度『扯蝦』，完全畀智叔KO咗。（諗到乜嘢喊到咁？情傷？）我哋演戲唔鼓勵代入，同埋同智叔點情傷呀！」

名花有主唔敢望

談及Stephy傳已婚，他表現驚訝：「係咩？（有冇恭喜佢？）真係㗎？恭喜晒！恭喜晒！（有問佢？）我唔知，我都唔得閒睇新聞，等我一陣問下佢先！（方力申去探佢班？）冇喎！」Bosco又謂冇留意對方的「SF」車牌，指大家用電影組的車，當被指乜都唔留意Stephy，他即笑說：「人哋名花有主，唔好搞人啦！望都望少兩眼，唔敢望呀！（咁搞緊邊個？）我成日都叫佢哋介紹啲畀我！搞吓Madam（盧宛茵）囉，哈哈！」

請問有乜好介紹

對於舊愛胡杏兒稱有圈外人追求，Bosco大方地恭喜是好事。祝福對方？他說：「好事咪即係祝福囉！（酸溜溜？）冇呀。（人有你冇！）咁耐咯已經。（有聯絡？）得啦，問夠喇！（豈不是冇機會？）你快啲畀個人我追，有乜好介紹？（冇復合機會？）講咗好多次啦呢啲又問。（揀岑麗香？）佢喺我心目中係小妹妹，但我鍾意獨立啲、諗嘢成熟啲，同我會夾啲。」