郭富城解畫愈幫愈忙：子丹喺度 邊個敢出聲

於新片《西遊記之大鬧天宮》中飾演「牛魔王」的藝人郭富城（城城），現身九龍塘為浸會大學擔任講座嘉賓。全程以黑超「chok」住出場的他，稱今次在新片中顛覆過往牛魔王的「小男人」形象，實行以「man」爆的魔族英雄造型登場。他又搞笑大爆化「牛角妝」絕非像「插雪糕筒」上頭般簡單，城城說：「要化三個半鐘。（辛苦過之前拍戲？）今次妝容要求好高，要一絲不苟！」

談到在新片兼任男主角及武術指導的甄子丹，被周潤發笑指脾氣差，城城即代為解畫謂：「每人都有脾氣，佢發助手脾氣，唔係發演員脾氣。因為佢要求高，有次助手連續四、五次都完成唔到個動作，佢見到演員好辛苦就會忟憎，係情有可原！」問到他自己會否都「忟埋一份」？他即笑言：「子丹喺度，邊個敢出聲？」他更稱跟子丹惺惺相識：「佢武功高強，我舞蹈都好高強，我唔驚佢㗎，佢仲驚我！」

另談到舊愛熊黛林被指有有米新歡，城城先拒絕回應：「唔回應，唔關自己事。」但最後仍大方送上祝福。