陳茵媺大談湊仔經 想學識讀心術

陳茵媺（Aimee）又在《好報》大談湊仔經，連仔仔英文名也要改作「Aiden Joshua」，就知對囝囝的期望有多高。「我覺得唔容易，好多嘢要慢慢學，更加欣賞媽咪以前湊大我係幾辛苦！湊小朋友乜都難，由餵佢、換尿片、沖涼、佢喊嗰陣要知道聲音代表乜原因……全部都唔容易，有佢o既難處，每日要學識解決問題。因為我係新手媽咪，所有嘢都要學，每個BB性格都唔同，問朋友都係傳承自己o既經歷，但原來係要重新去認識自己o既BB！BB係一個人，係一個生命，佢有自己o既性格，有自己o既感受，佢有自己思想o既能力，所以要重新去了解呢個人，要知道佢鍾意同唔鍾意啲乜，要同佢有互動，要對佢同自己有信心！」

猜透人的性格已難，猜透BB想甚麼更難，做父母原來要識讀心，還要曉得「初心讀心術」：「Aiden好醒瞓，係一個活躍o既BB，好可愛有小聰明，好快會學到嘢，仲好快會畀到反應你，好早會識得點同你溝通！見到佢眼神同嘴就知，佢想同你講嘢，帶番屋企幾個星期就知佢想同你傾偈，佢亦都好明你想講乜，佢大個可能係一個言論巨人，哈哈。Aiden絕對係一個思考型o既BB，有時佢好似想講嘢畀你聽，可惜我又唔明，真係好想識讀心術！」

講到尾，究竟是媽咪湊仔叻還是爹哋呢？Aimee摸著鼻子說：「哈哈！好幸運我覺得兩個都OK，大家都係學習當中，每件事都會一齊去做、一齊為BB下決定，一個家庭係需要團結，父母一定要企喺同一個立場先得，So Far都OK！」

小Aiden將來成就會係點？飛機師？科學家？歌星？演員？還是賣咖啡？天曉得，Aimee與阿Mo現時只需要BB健健康康，搵定幼稚園？長遠了一點吧：「係未搵o既（指幼稚園）！我聽講係好困難同好頭痛，依家未咁快諗得咁遠，但身邊有小朋友o既朋友都會提我哋，我哋每間學校都會做Research，但依家只係得六周大，仲好細個，暫時都係集中希望佢身體健康同肥肥白白，佢依家都重咗成4、5磅，有12磅喇！一個月已經重咁多，好犀利呀！我依家仲坐緊月，偷偷哋出嚟做宣傳，我自己要好好調理番身體，仲未完全Recover，所以我同Mo o既健康都要注意，一切為咗BB！」