群星賀歲：馬德鐘張筱蘭互餵煙靭度歲

近年轉戰大陸巿場的馬德鐘，過去十年因忙於拍劇，從未放過新年假。難得今年有假期，他將與太太及兒子去倫敦度新歲，他笑說：「好開心，十年未試過，依家唔想工作量咁密，心態有少少唔同，想工作和屋企平衡啲。」身邊的馬太張筱蘭聞言即取笑老公是「小強」，意味打不死。馬德鐘又指自己喜歡拍劇不規律的生活，朝九晚五反而頂唔順。馬德鐘又大爆小時候十分不習慣某些過年習俗：「三日唔准洗頭，掃地要由門口掃入屋，依家已經做唔到。」

馬德鐘透露愛吃傳統意頭菜式，日前更相約太太吃賀年菜，當中有由三文魚及鮑魚煮成的「風生水起」，十分好意頭。期間，二人還大晒恩愛玩互餵，場面極度溫馨。談到新年願望，馬德鐘希望挑戰特別的角色，更不介意做乸型，他說：「今年好希望可以考個大偈船牌，如果好畀心機讀書，應該一年內可以考到，第時可以駕船自由自在出海潛水。」馬太聞言即冧爆謂：「老公新年願望，就係我的新年願望。」恩愛之情羨煞旁人。