郭富城鬧市策騎 風騷跳起

郭富城到尖沙咀海港城出席新春活動，著住「黃馬褂」加閃爆「金超」的他騎著真馬出場，非常威風！繞場一周後，他上台向圍觀市民拜年，並獲財神送上利是、金元寶和剪紙畫，開心到飛起的城城興奮得跳起影相，並為幾頭舞獅點睛。

他有份主演的電影《大鬧天宮》內地票房破3.1億（約3.9億港元），城城興奮地說：「好鼓舞，恭喜導演！（會拍續集？）唔知呢！睇老闆意願。（有傳黃曉明會加入？）多啲演員加入係好事，相信觀眾都會想睇。（你繼續做牛魔王？）未知，希望有得繼續參與。（想唔想試吓其他角色？）牛魔王都幾好吖，顛覆咗個性格。」並稱希望可以原班人馬拍續集。

他又指2014年將會主力拍攝電影，將接拍4部戲，包括《寒戰2》，而自己執導的電影劇本希望在馬年可以完成：「劇本寫得七七八八，故事大綱寫好晒，希望馬年可以完成埋啲對白，改埋個戲名，個名好重要！另外自己想抽多隻馬，再養多隻馬，叫『唱這歌』或者『動起來』，等『愛的呼喚』有個伴。」