黎耀祥爆黃宗澤拍劇心花怒放

藝人黎耀祥出席商場新春活動，揮動龍珠的祥仔更為首帶龍獅隊繞場一周，他透露新年期連放了三日假都是陪家人：「初四就開劇拍《無雙譜》，由年尾做到年頭，我都係啱啱開完外景過嚟。（因拍劇而少咗機會搵外快？）都係呀！時間都好難就，大陸就好多人回鄉，美加都飛唔切啦。」問到有否發新年財？他說：「冇呀，我阿哥個女返咗嚟，話未入過馬場所以就同咗佢入去，不過冇贏到，貢獻咗少少。」

正與黃宗澤（Bosco）一同拍劇的他對於「崢澤戀」亦表示恭喜：「見到佢都好開心，都戥佢開心。（有冇驚訝佢哋拍拖？）都有少少，不過佢哋幾襯呀！一個係型男，一個係近乎Model嘅演員。（有指女方大過男方9年！）依家咩世代，唔好咁封建，年紀唔係問題啦，緣分嚟冇話接受唔到嘅，最緊要溝通得到。（佢拍劇時係咪成日一副含春樣？）唔好咁衰，係心花怒放，佢個人一向都好開心。」問到Bosco女友楊崢有否前來探班？祥仔說：「冇咁快，啱啱先開始，遲啲啦，希望啦。」