獨家：宣萱與鄰居爭執　遭爆粗報警求助

與宣萱（Jessica）住在同一屋苑的住客，投訴宣萱多次無故把座駕橫泊，阻礙其他住客汽車出入，不過記者向宣萱求證時她卻道出另一版本，她表示是她的車先被對方的車阻塞，她要求對方把車駛開，豈料對方的太太表示車匙被丈夫拿走，最終要苦等一小時，對方才回來。

人身安全受威脅

宣萱說：「佢呢個行為好自私，所以我搵番自己架車頂番住佢，要畀佢感受畀人頂嘅滋味，跟住佢開始發難，不停用粗口鬧我，仲用個頭『哄』埋我面前想打我，佢太太喺旁邊用手機拍住我添！我覺得自己人身安全受威脅就去報警，警員到場後就勸我哋，話係私人地方，叫大家自行解決就走咗！」

「連我媽咪都唔放過」

宣萱又表示事件未完結，晚上母親到前來晚膳，期間聽到這對夫婦在天台以粗口繼續鬧，「我送媽咪出門口時，對方連我媽咪都唔放過，用粗口鬧佢，媽咪亦忍唔住，同佢哋理論，我就叫佢冷靜啲！可能對方覺得我係藝人，如果將件事公開一定係我蝕底，但我問心無愧，唔怕佢，話我精神不穩，我覺得佢哋仲嚴重過我。」