萬綺雯不介意外界指她「執三攤」

擁有42吋長腿的凍齡美魔女萬綺雯（蚊蚊），在新劇《食為奴》中，與《老表，你好嘢！》王祖藍、張繼聰、林盛斌，以及新對手黃智賢（Ben）結劇緣，蚊蚊指拍攝過程非常開心，她說：「再合作當然想好似上次咁好收視，但唔會有太大壓力。今次同阿Ben首次合作，佢個樣好嚴肅，實則好好玩，搞笑又細心，喺橫店試過幫我出去買嘢食，買咗粟米、蛋餅同豆腐，但我一個人邊食得咁多？後尾原來蛋餅太鹹、豆腐變壞，最終只食到粟米，如果佢唔買三樣嘢，可能我就冇嘢食！因為我有好多動作戲，要控制飲食，動作亦要即學即打，好在我中學有玩體操同彈床，好快攞到個感覺，有場我同張繼聰耍功夫，差啲打中塊面。（唔驚破相？）拍戲要信任對方，如果唔係仲牙煙。」

蚊蚊稱不介意外界指她是「執三攤」（《食》劇演員多番更改，蚊蚊角色由陳法拉變鍾嘉欣，最後才落實由蚊蚊演出），她說：「唔介意，呢行成日變來變去，唔同人有唔同效果，擦出火花最緊要，我只關心點樣做到最好！唔會理閒言。（老公陳十三點評你演出？）佢會關心我動作戲安唔安全，其餘任我自由發揮，我係熱愛自由嘅人，唔可以被綁住o架！」