王祖藍自爆入行前每日得40蚊零用錢

一劇接一劇的王祖藍日前在電台重提入行前的辛酸史，讀書時他每日只有40元零用錢，令到拍拖都有困難：「每日40蚊點拍拖？惟有等快餐店有優惠券推出，同女朋友去食。」入行後參與兒童節目的他透露只有4800元底薪：「點養家？我唔夠膽去旅行、買車，最刻苦嘅時間係2003-2005年，因為終於還晒啲債。」

最終他等到機會，事業上有突破成績，他說：「非常感恩，還清晒啲債之後就大叫出來，同屋企人去咗食飯慶祝，好記得當時一身輕嘅感覺。嗰時好多領悟，好多弟兄姊妹陪我，又一齊喊過，反而有時人生太順利會易迷茫，正所謂小小苦楚等於激勵。」