田蕊妮護夫　叫秋生改名Anything Wrong

田蕊妮到電台宣傳即將推出的新碟，她表示新碟推出日期撞正老公杜汶澤新戲上映日期，而大讚有緣：「仲要我哋喺銅鑼灣嘅廣告板係放埋一齊，好多朋友影低畀我睇。」

問到有冇睇到秋生鬧阿澤新聞？阿田笑說：「點會睇唔到？咁當眼，同個廣告板一樣咁當眼。唉，我真係百思不得其解。（秋生啄住佢？）係囉！Anthony wong，anything wrong？叫佢改吓名，明明私底下無事發生。」

問到可會做和事老勸交？她說：「無呀，我覺得無咩需要和事，都無鬧交，我老公都無鬧過佢。」提到秋生指阿澤無晒朋友，秋生是最後一個走？阿田繼續代夫出頭說：「走咗去邊樹？我仲喺樹呀，仲健在，冇咁短命，我一路都覺得我哋仲有好多朋友。」

問可會叫老公講少啲嘢？阿田說：「佢都唔係講好多嘢，香港係言論自由社會，我相信杜生同秋生都係有熱誠嘅人。」

阿田又指阿澤未有受影響：「我覺得呢個世界唔係相向，唔係熱血嘅人先可話佢冷血。（抱不平？）我冇乜血，上唔到腦，諗唔到嘢。」

問到阿澤今年是否犯太歲才惹是非？阿田笑說：「咁要搵條罅比佢攝，但秋生似犯太歲多啲，佢個人好躁底。」