老公貼心撐場　劉嘉玲：開心日日都係情人節

女星劉嘉玲出席有份投資的家品店活動，丈夫梁朝偉亦有畀面撐場。對於偉仔表示有意學跳舞，嘉玲笑指自己也會跳舞，只是程度深淺問題，又謂自己每天都有做運動，如跑步及瑜伽等。

笑問她白色情人節會否跟偉仔慶祝？她笑說：「我哋冇呢個習慣，大家都咁大個人，如果開心就日日都係情人節。世事無常，大家珍惜吓地球資源、珍惜家人朋友啦。」早前曾透露有意做導演的嘉玲，被問到進展如何，她即表示還未確實，並謂自己不想拍攝愛情電影，希望拍一些大家意想不到的暴力或色情電影。

指王菲一個人很開心

對於有指好友趙薇有意撮合王菲及謝霆鋒，她表示不知情：「我唔知，亦唔識講，不過呢個世界乜都會發生，成隻飛機唔見咗成個禮拜都搵唔到，所以唔會覺得出奇，一日未死都有新聞聽。（咁你想唔想阿菲快啲搵到個伴？）佢一個人幾好呀，一個人都幾開心，兩個人有兩個人嘅開心，但亦有兩個人嘅唔開心，總之自己過得開心就得。」