穿同色戰衣向「女神苟」示威　熊黛林：好多人讚我

熊黛林（Lynn）出席在馬場舉行的汽車活動，她乘坐開篷跑車壓軸登場，身穿鮮黃色中空長裙的她明艷照人。問作如此性感打扮，心臟會否卜卜跳？她笑說：「唔會，好靚，係真空上陣，冇得打底、冇得走光，因為走光通常走打底嗰啲野，我重要位置黐咗嘢。」Lynn表示裙是公司選的，並表示螢光黃好靚。

強調以後搵對象要專一

不過巧合的是，昨日苟芸慧與城城出席活動時，都是黃色戰衣上陣，Lynn這身打扮，似是有心向被城城封做女神的苟姑娘示威。對於與苟芸慧戰衣撞色，Lynn說：「我冇睇到，今年興嘛。（你哋品味一致？）要喺娛樂圈長久，衣着要有啲品味，要跟潮流。」問苟姑娘與城城傳出緋聞後，首次一同出席活動，Lynn會否心裏不是味兒？她說：「點會？我有睇報道，知件事，但冇留意件衫。（依家已經好放鬆唔介意？）有咩好介意？（城城讚佢係女神，有冇讚過你？）好多人讚我。」問白色情人節有否收到禮物？她說：「未搵到，如果早知道（情人節），早啲搵個人讚我，淨係讚我，淨係鍾意我一個。」

暗寸有人長不大

另提到有指城城在Instagram結識十八個o靚模，她笑說：「你哋表情好嚴重，我有玩，關注嘅都係朋友，有五十個，我啱啱開始玩，唔知人哋account，自己關注鍾意嘅人。」她坦言不是記者提，也不知道城城有玩。問如今知道，會否關注對方？她說：「關注咗我啲朋友先啦！（佢add十八個o靚模係咪好濫？）嘻嘻，唔知點代佢答，我add嘅係我朋友，欣賞嘅藝人。人哋加咩人，冇得講，最緊要有娛樂作用。（佢識啲女仔愈來愈後生？）呢啲唔係我理嘅事。」她自言喜歡心態成熟的人，更語帶雙關謂：「唔通六、七十歲仲成個細路仔咁咩？當然如果年紀細過我，但照顧到我同錫我都冇所謂。」