黃智雯拍劇不介意跳艷舞

藝人黃智雯於屯門以代言人身分出席美容店開張活動，露香肩的她於受訪期間自爆正為四月拍民初古裝劇的色誘戲份而Keep fit。她說：「之前去韓國食大咗，仲重咗幾磅。四月會同馬國明、周麗淇拍無綫新劇，我近排狂煲粵語長片學啲苦命妹仔講嘅嘢。」問到會否有感情線？她說：「我會暗戀陸永（色誘荀盤馬國明？）色誘邊個就賣個關子先（色誘尺度幾大？）電視尺度，會好含蓄咁勾引人。六月仲會去佛山繼續拍（驚唔驚同馬國明傳緋聞？）唔會，合作咗咁多次。」

談到她是否因有男友而不參加無綫節目《搵個好男人》？她即大讚節目富娛樂性：「如果係工作，參加都冇所謂。」問到是否男友不準拍？她說：「工作啫，當識個朋友。節目好有娛樂性同好好笑（當中有騎呢參賽者？）唔騎呢，好真。特別係跳拉丁舞的參賽者，幾得意，邊唱邊跳。」問到你會否為男友跳舞？她說：「會跳Jazz（若拍劇要跳艷舞？）唔介意，跳出嚟靚就得（尺度如何？）露Bra top、腰同魚網絲襪都OK。」