曾華倩想同青雲拍中年版《星星》

藝人曾華倩今日到尖沙咀出席兒童繪畫比賽，並擔任活動大使，她指兒子小時候都有學畫畫。而今日聲音沙啞的華倩原來之前大感冒，所以決定戴太陽眼鏡遮一遮，但表示開始逐漸康復中：「之前仲病到冇哂聲，搞到好情緒低落，同埋太攰一次過發哂出嚟。（點解？）因為出埠做嘢，奔波勞碌，同埋天氣，加加埋埋啦！」

問未來會否有新劇？華倩就坦言仍以主持為主：「拍劇要夾啱天時地利人和。（今年冇諗住拍？）除非劇本好吸引，又咁啱人哋又搵我。（有冇搵你？）有嘅，但因為時間關係就撞咗期。」多年沒拍劇的華倩又表示想拍劇過戲癮。

而怕沉迷煲劇嘅華倩又自言看到劇集會代入，又大讚《來自星星的你》劇本、演員和音樂等都好完整，看了一集就停唔到。問如果無綫開拍《星星》華倩會否接劇？她就笑問是否「中年版」，又表示有信心做全智賢：「但我諗男對手搵邊個，緊係要靚仔啦！（林峯？）唔得，後生得滯。劉青雲就啱嘅，但佢黑得滯。（古天樂？）都得o架！方中信都得，都係要襯番自己！」