栢芝揀男友唔需要有錢

張栢芝接受電台訪問，講到會否再公開戀情？栢芝就話冇乜必要就唔會公開同解釋，她說：「除非攻擊到我身邊嘅人先會，所以經常食死貓食飽，同食到大，就算被人誤解都唔會出聲。」栢芝又話未結婚前會豁出去，但離婚後有兩個仔，就算拍拖，有蛇咬都唔會講，她說：「第一，如果唔覺得個男人可以付託終身嘅話，唔想兩個仔覺得咁多Uncle嘅，第二，想搵個圈外人，因為圈內人要闖一番事業，闖到五十歲都仲闖緊，又要顧媒體又要顧Fans，所以相處比較難。」

問到男仔要用咩攻勢先可以追到栢芝？栢芝就話只要做一種嘢就可以感動到佢：「佢要完全可以不顧一切而唔介意我係明星，要當我係普通人，我都係要食飯同去厠所，唔係食電池，係飲水唔係飲電油，亦唔介意媒體會寫佢，我就會毫無反顧咁跟隨呢個男仔，如果有呢個男仔一定感動我，佢唔需要有錢，事業唔需要有成，因為愛比任何都重要，金錢對我嚟講夠食夠住，今日揸貴車聽日可以坐巴士，周潤發都會搭港鐵啦。」

如果選擇外遊拍拖，栢芝首選日本同泰國，但講到呢兩個地方都好多香港人去，栢芝話結婚五年，離婚四年，成十幾年冇去過日本拍拖，最後栢芝笑言首要係幫佢搵個男朋友先。