不死小強阮民安Vs天堂鳥爭做MK盟主

有不死小強之稱的MK始祖Tommy仔（阮民安）與MK-pop天堂鳥終於有機會同場較量！

佢哋一齊喺旺角出席活動，Tommy仔以經典MK金毛示人，不過未到中年已經開始發福，佢死撐係為咗練大隻而先增肥，至於天堂鳥就以一貫濃妝配色彩繽紛造型登場，大會仲玩嘢，叫Tommy仔將「MK之捧」傳畀天堂鳥，延續MK-pop！

天堂鳥三子足足高Tommy成個頭，贏晒高度，連Tommy都忍唔住話話：「我見唔到佢哋，淨係睇到心口！」但佢哋一齊受訪時，全程得Tommy仔講晒唔畀人講，仲居然叫後輩加油：「幫佢哋做嘢嘅人我都識，唔可以亂講嘢！」問對後輩有乜評語？佢欲言又止話：「有人留意到，好事嚟嘅，佢哋都幾唔好彩，依家網上好多嘢發表，都幾難搞！其實佢哋都放咗好多心機同時間，都幾陰公嘅。」

而天堂鳥就即場請教前輩點樣平衡自己心理？Tommy仔即Hard Sell自己話：「聽吓我嘅歌！其實惟有當聽唔到，都有鍾意佢哋嘅人，做好畀佢哋睇，其他完全當聽唔到。（會唔會有合作？）整首《魅力太陽》囉！同E-kids另外兩個成員傾吓先，搵吓先！」Tommy仔搶咪講晒，嘉賓就喺旁邊喪笑！