田蕊妮為個唱狂減　驚見23吋腰

田蕊妮為本月中的音樂會綵排練習，阿田自爆自己已經因為太緊張而開始失眠，又話：「一直覺得自己好肥，驚着唔到音樂會啲性感衫，所以好努力咁減肥，但老公（杜汶澤）話我太瘦唔好再減，結果我前幾日去試衫先發現已經瘦到得番23吋腰。」

至於阿澤會否在音樂會上畀驚喜阿田？阿田笑指：「唔好喇，我已經好驚o架喇，唔好再畀驚喜我！」而問到演唱會嘉賓，阿田透露：「請咗我由細聽到大嘅蘇永康同埋彈一手好吉他嘅新人GJ蔣卓嘉。」

提到新碟大賣斷市，阿田表示：「有朋友同我投訴買唔到碟，依加再訂緊貨，我自己本身買咗30隻想送人，有朋友笑我買得太少，今次再訂咗100隻（老公有冇買？）佢打算買5月出嗰隻黑膠碟，仲買埋個盤返嚟聽。」