金像獎：《一》片慶功　偉仔無奈子怡黑面

由王家衛執導的電影《一代宗師》以大熱門姿態橫掃共12個獎項，當中包括相隔19年再奪得「最佳導演」的王家衛、「最佳女主角」章子怡、「最佳男配角」張晉等，成為「第33屆金像獎」頒獎典禮大贏家並打破紀錄成為史上獲得最多「金像獎」的電影，章子怡更憑此戲成為「九料」影后。

頒獎禮完結後，《一》及《逆光飛翔》的台前幕後到劉嘉玲開設的餐廳舉行慶功宴。「九料」影后章子怡被問到有否收到恭喜她的電話及短訊時，她口窒窒說：「有收到。」之後就示意不要再問，最後更不再接受訪問黑面走人。

而另外兩位得獎者王家衛同張晉接受訪問時就表示開心。談到此戲成為大贏家，王家衛說：「好開心，今日有好多人遠道而來，好高興每個人都得到個人榮譽。（梁朝偉失落影帝失望？）有少少失望，等梁朝偉唔好咁驕傲，出多啲力拍戲，不過佢都出咗好多力，但係所有人對佢嘅期望係唔一樣，會高啲，想佢有更大驚喜，今時今日嘅梁朝偉唔需要證明任何嘢，佢可以做自己想做嘅嘢。」

王家衛又表示從籌備到拍攝，就算沒有獎項也值得：「大家好似一家人一樣。」張晉亦笑說：「我由冇女，拍到有2個女，點會冇感情。」王家衛聞言亦為張晉得獎高興：「見到佢有呢個成績都為佢高興，香港嘅動作演員愈嚟愈少，佢可以好優秀，有好大可塑性，希望個圈多啲新血。（搵佢多啲拍戲？）佢依家點會得閒呀。」張晉即表示導演叫到一定無問題：「佢好似睇住我長大咁，我都會繼續成長。（老婆蔡少芬點獎勵你？）唔使啦！365日都係獎勵。（幫你生多個？）獎嚟㗎咩？係懲罰，其實佢都好為我開心，除咗笑就喊。」

而失落影帝嘅梁朝偉出席慶功時，可能係太攰嘅關係，個樣有點無奈，他沒有直接受訪，而是透過工作人員表示：「呢部戲攞獎就等於我攞獎。」甚有大將風範！