關禮傑52歲未熄火要拍代表作

近日晚上無綫兩套師奶劇集中，關禮傑均有份演出，雖然他已52歲但樣貌與身形無變過，對此他笑說︰「因為成日做運動，而且呢個圈子自己仲有團火喺度，仲想有代表作，所以呢一團火畀到自己要健康同keep fit，盡量同輝仔（張兆輝）踢波做運動。」

對於在劇集《愛我請留言》中以搞笑形象示人，他直言演出有相當難度，但太太煲劇時睇到嘻嘻哈哈，他感到非常開心說︰「佢會覺得《愛》劇好睇同得意，睇到嘻嘻哈哈幾過癮。」

連囡囡也是其捧場客，但對在《叛逃》中的嚴肅一面，反而嚇到囡囡同學，他表示︰「囡囡都有睇，佢同學話我好mean，不過都係好事嚟。」