張晉奪獎談加片酬：鍾意我嘅人會覺得值

勇奪第33屆香港電影金像獎「最佳男配角」嘅張晉於今日出席活動，接受資深傳媒人陳圖安（Jacky）嘅訪問。事前問到張晉有否睇到網友恭賀佢得獎嘅留言，佢即坦言工作密密麻麻，手機又響唔停，但卻未能抽空睇晒所有賀詞：「我有睇一啲，不過真係冇時間仔細去睇，因為我嘅生活真係太忙。Ada（蔡少芬）去咗大陸工作，我多數時間都係睇住兩個女，自己冇乜時間。等佢哋瞓咗，其實我都好眼瞓啦！時間好短，冇時間睇。Ada問我有冇睇返，佢喺大陸開工當然大把時間啦！」講到老婆Ada會否因為自己被人讚而喜悅，張晉笑言：「當然會，一個正常嘅女人當個老公畀人讚，都會好開心。」

忙於湊女嘅張晉仍未能正式搞慶功宴祝賀自己奪獎，表示等老婆完成工作後返港，就會同家人及好友補祝，以表達多謝大家對自己嘅愛。提到Ada前日喺微博自爆張晉同兩位千金嘅搞笑對話，張晉亦笑言：「個女睇到個獎都唔明係咩事，好搞笑！佢睇到媽媽喊話媽媽冇獎攞，我喺車上面爆笑咗出嚟！」回復心情後嘅張晉坦言自己要更加努力，得到肯定亦有增加信心。問到得獎後會否加片酬，張晉表示：「嚟啲係市場肯定，呢樣我話唔到事，鍾意我嘅人會覺得值，唔鍾意我嘅人唔使錢都唔要我啦。」