任達華首拍3D戲　自誇打得好過甄子丹

任達華接受有線高清娛樂台《電影蒙太奇》主持可宜訪問，暢談拍攝新片《3D冰封俠：重生之門》的難忘事。

首次接拍3D電影，華哥表示與過往拍攝電影的感覺很不同：「拍3D電影節奏好慢，因為啲攝影機好大，運作幾困難，拍攝前嘅準備功夫同一般電影好唔同。如果係拍打戲，節奏會更加慢。」甄子丹及王寶強在戲中有多場打鬥場面，相對華哥的打鬥的場面較少，他笑言：「佢哋驚我打得好過佢哋！」

主角甄子丹是華哥在戲中的對手，更身兼動作導演，華哥大讚子丹對電影盡心盡力：「佢對武術好有熱誠及清新感，而且要求好高！不過要求高，電影先會有質素，依個好緊要。子丹花咗唔少心思喺打鬥場面，例如有一幕係喺長白山拍攝，當地不單止好凍，仲有雪崩。全靠大家嘅努力，我哋先可以喺重重困難同惡劣環境下完成依部戲。」

眾人在困難及惡劣環境下完成拍攝，辛苦程度就連好戲之人的華哥都坦言不希望再開拍第三集：「《冰封俠》已經拍咗第一、二集，大家遇過冰封，同埋有好多危險動作，拍攝太辛苦喇，所以千祈唔好再開拍第三集。我拍完《冰封俠》後，好怕凍，唔敢食沙冰，就連飲嘢都要揀熱飲，no ice！」