張智霖壓力爆煲患焦慮　速揈450萬調劑心理

42歲張智霖（Chilam）大前年在紅館開兩場演唱會後，今年再開三場，真係不容有失，加上接下多部片約，工作壓力爆煲。最新一期《好報》披露Chilam近日患上焦慮症，更以喪揈錢來減壓。速試速買暫時全港只得一輛的法拉利458 Speciale做「玩具」，一揈就是450萬元。

知情人士說：「Chilam為咗個演唱會，近日真係搞到冇覺好瞓，因為真係不容有失，試過夜媽媽凌晨三點幾Send Message畀工作人員，話要改呢樣改嗰樣，仲有，佢本身係一個熱情嘅人，但呢排一返到屋企就粒聲唔出，抦埋一邊，自己係咁度橋囉！」

返到屋企變「Cool魔」，老婆袁詠儀(靚靚)也擔心Chilam壓力過臨界點，當知道老公有意買450萬辣跑，亦罕有御准他狂揈錢減壓。查實Chilam自《衝上雲霄2》「Cool魔」一角人氣再度急升後，以天價簽約蕭定一，上半年喪接戲之餘，為了今次三場個唱已進行地獄式操肌，儘管優先認購門票情況理想，但Chilam事事都親力親為，拍MV不但充當導演兼碌人情卡廣邀好友伍詠薇和蔡一傑等助陣，連演唱會海報設計亦自己一手搞掂，絕不假手於人。

壓力倍增的Chilam，日前撇低太太袁詠儀，獨自到銅鑼灣香港大球場附近避車處，身邊有一名西裝友傍實，附近則停泊一輛全港目前只得一部的法拉利458 Speciale，原來傍實他的正是汽車經紀，Chilam難得抽到空檔出來試車，即興奮拔足走近辣跑，愛不釋手，對辣跑每個細節都一絲不苟檢查，又不停詢問經紀。

Chilam掀起引擎玻璃蓋後，指手畫腳細心研究，像專家一樣，當坐上司機位將車匙一撻，Chilam隨即踩着油門，享受辣跑帶來的無比快感。據Chilam身邊好友了解，原來Chilam早前不時在網上搵新車，為車庫增添生力軍，當知道458 Speciale新車來港後便狂搵資料，二話不說打電話給相熟經紀相約時間試車，並火速決意成為這輛價值450萬元辣跑的香港第一位車主，知情人士說：「試完車後Chilam冇乜點諗就拍板買車，佢鍾意程度簡直瘋狂，架車真係好貴，只係噴賽車嗰兩條邊都要十幾廿萬，不過佢鍾意Batman，所以會等黑色版來港先揸！」