袁潔瑩未必再接劇：拍十五個鐘就好辛苦

藝人袁潔瑩下午接受電台訪問，談到有份主演的劇集《女人俱樂部》，她指聽聞平均收視26點，更一度飆升到28點，問到是否滿意成績？她說：「我唔知依家收視幾多先合格，希望我哋收視慢慢上番，因為少有呢啲題材，講班女仔由細識到大，所以觀眾要warm up吓。（自己有睇？）有時夜晚睇myTV，依家都好方便，佢哋話myTV都有計。（叫朋友捧場？）隨緣啦，喺屋企咪睇囉，有朋友叫我收線話要睇我套劇。」

問到會否逐步復出拍劇？袁潔瑩卻直言怕攰，稱暫時未必再接劇：「如果凌晨12點收工我就拍，依家我瞓得好多，尋晚夜啲瞓，雖然瞓夠八個鐘，但都好似差好多。其實離開咗十年，之前（退出）係因為身體支持唔住，今次角色係幾輕鬆，但好多時拍到4、5點，好難適應十幾個鐘運作時間，加上我都一把年紀，依家拍15個鐘就好辛苦，但邊好意思拍拍吓自己話走，呢啲係專業操守，出返嚟無謂留下唔好說話。」她又笑言自己懶慣，不可捱夜，但坦言很享受拍劇，現在則留給後輩去享受。