傅穎末路無人吼　轉死性搵碼頭

新一期《好報》獨家披露星晧放棄傅穎，提早解約，賓主關係不再，死因就是傅穎繼續百彈齋主的麻煩本色，左彈右彈！前路茫茫，傅穎為挽星途惟有轉死性，四圍主動拍門，當中包括向曾傳不和的鄭中基賣口乖求破冰外，更主動向周秀娜經理人公司GME拍門，甘願紆尊降貴做師妹！你揀人，人揀你，傅穎的麻煩本色出晒名，GME一句：「Never！」睇嚟興趣就真係......

三年前公開數臭舊愛羅仲謙的傅穎，因形象插水，故轉而陣地往台灣及內地發展。歷經不少麻煩是非的傅穎，依然不改百彈齋主的本色，包括計較戲份多少、彈造型及劇本有問題等，加上有人又恃着和中介公司熟絡，自行接洽工作外，又要公司代為處理私事多過公事。忍無可忍，據知本來星皓跟傅穎還有三年合約，但星皓已決定放棄傅穎，並提出解約！同時傅穎也有感星皓始終重視同公司的舊愛羅仲謙，大感冇癮，故同意正式解約，各行各路！早前她在微博的個人簡介中附上個人電郵地址，指「任何戲劇、廣告、商演等」工作可循該電郵接洽，靠自己接Job。

變成「無主」孤魂，前路茫茫，傅穎一改以往不愛應酬的作風，主動四出玩埋堆，望泊得新碼頭！近日傅穎頻頻出動並網上大晒與台前幕後的合照，包括與導演兼電影公司高層陳嘉上飯局留影，並出口術讚對方：「我最尊敬的導演」！最令人嘖嘖稱奇的是，傅穎跟多年前鬧不和的鄭中基，也搭晒膊頭合照並留言：「『三分鐘先生』後再見你，帥了也更有魅力了，是變成爸爸後的影響嗎？」開口埋口都讚到天上有地下無，擺明主動破冰賣口乖！

雖然傅穎以「仙女散花」攻勢四出拍門，但其出名麻煩是非的本色，人所共知，要泊得好碼頭也絕非易事！據知，她曾主動向周秀娜的經理人公司GME拍門，並甘願紆尊降貴做娜姐師妹！本報致電娜姐經理人Roy，問到Theresa曾否主動拍門一事，Roy透過短訊斷言回覆：「Never！公司今年只會簽高知名度嘅藝人，包括歌手杜德偉、曾奪影帝及金鐘獎最佳男主角范植偉。」一句「Never」，又話明只簽高知名度藝人，明啦！