林峯愛千語BB表情豐富：佢味蕾好勁

林峯、佘詩曼、苗僑偉（三哥）與新劇《使徒行者》的台前幕後工作人員到西環出席煞科飯局，林峯說：「呢三個月辛苦大家，雖然有波折，總算有驚無險拍完晒。（你埋單？）我、阿佘同三哥夾份。嚟近我開始籌備澳門同大陸演唱會，（暫停接劇？）依家都一年一劇，睇時間分配再決定。（留時間拍拖？）女友（吳千語）都忙，互相遷就吓。」

問到母親節會否安排女友與母親慶祝，他說：「要睇工作安排，（千語因為被指同你行街時扁嘴，所以唔開心？）唔係呀！只係報道講佢扁嘴，佢表情好豐富。都唔會唔開心，大家都做呢行，會明白，我哋私下好開心，正常生活。（鍾意玩煮飯仔？）我有興趣，但佢就好有天份，未識佢之前，我以為自己好有煮嘢食天份，但原來我喺佢面前只係班門弄斧，佢食過乜都可以整番出嚟，味蕾好勁，可以食出每道菜所用嘅材料！」