肥媽妒忌陸浩明食極唔肥

由肥媽和陸浩明（6號）拍檔主持的節目《食平DD》大受歡迎，今輯肥媽教了不少新潮菜式，肥媽就歸功於拍檔6號，她亦非常滿意6號的表現，讚他幫到手：「煮嘢就幫唔到嫁啦，佢嘅責任係搗亂，但係就畀咗好多意見我，好似依家啲後生興啲咩咁，我都希望除咗師奶觀眾，都迎合啲後生，等啲師奶都新潮啲！」不過肥媽就自爆自己妒忌6號：「食極唔肥，一日食至少十幾道餸都唔會肥，你話係咪嬲！」

肥媽絕對可以講係煮食成癡，試過一日錄九集都不覺得攰，她謂：「我一唱歌同煮嘢食就停唔到。」又試過和老公行街市時，有粉絲請教烹飪，肥媽因講唔停而令老公不耐煩：「佢拉我衫袖問我講完未！」

今輯節目獲得大成功，6號亦期望能三度添食，衝出香港製作《食平3D》，不過6號就笑言自己雖主持了兩輯食平D系列，但其烹飪技術依然毫無進步，不過就練出一條挑剔的舌頭，他說：「出去食一樣嘅嘢，會覺得阿媽煮得好食啲！」記者笑言若女友親自下煮，他會否仍敢挑剔，聽罷他即面有難色，肥媽就馬上揶揄他：「佢見到女朋友個樣，就咩都覺得好食！」而6號就覺得自己多了一位前輩級的好朋友，更膽敢直呼肥媽的名字Maria，即被肥媽鬧他冇大冇小，非常搞笑。