娛樂專題：許雅婷客廳「大 近 視」

現年19歲的許雅婷（Kabby）兩年前簽約成為周秀娜師妹，早前與溫碧霞合拍電影《微交少女》正式出道，換來「翻版張栢芝」稱號，最近又與郭富城傳緋聞。走上星途的Kabby與一般少女一樣愛煲劇，更在新居客廳添置一部大電視，睇得夠近先過癮！

Kabby自小在溫室長大，為訓練自己獨立，月前選擇「離家出走」，與好友租住中上環一個約600呎的單位，學習凡事自給自足。由於業主不惜工本將屋內間隔徹底的「移形換影」，刪去了不必要的走廊位置，廚房改成開放式，空間感大增，Kabby笑說： 「入伙後帶同事上嚟House Warming，佢哋都問間屋係咪起碼有800呎！業主改裝得好好，舊樓又睇落比較實用，依家屋企變咗大家公餘時間嘅聚腳點！」

新舊Mix & Match

由於不是超大單位， Kabby放在客廳中的電視似乎有點Oversize，不過她卻自得其樂：「我本身好鍾意睇韓劇，有部大電視咁近睇先睇得開心嘛！好似早前大家追睇《來自星星的你》，人哋追得好貼，我就慳住睇，因為驚最尾冇晒存貨會勁失落！」她又自爆曾苦學韓文追星，更大讚《繼承者們》的李敏鎬有型靚仔，少女情懷總是詩！

而偏廳放了一部與Kabby少女風格不相符的黑膠唱盤，她珍藏的黑膠碟不是梅艷芳就是張國榮（哥哥），令人嘖嘖稱奇，她說：「講可能你都唔信，我份人其實好鍾意懷舊，哥哥更加係我男神，佢有獨有男性魅力，冇人能夠代替！」她更專誠在網上選購黑膠唱盤：「點知後嚟發覺類似唱盤喺香港都搵到，不過啲黑膠碟真係好有升值潛力，我其中一張Bee Gees珍藏， 當年只係賣29蚊，但我用咗二百幾蚊先喺二手度買到返嚟！」

襯托黑膠唱盤的，尚有轉角處的懷舊座地櫃，與現代化傢俬及燈飾共存，非常搶鏡，Kabby 笑說：「呢類傢俬其實一啲都唔難搵，我住上環嘛，一落街就好易搵到啦！況且真係幾實用，放到好多嘢。」

畫出彩紅

Kabby在偏廳擺放了兩張抽象畫作裝飾，原來出自其手筆：「我同朋友去畫廊畫㗎， 畫咗幾粒鐘，比想像中容易！ 因為有導師教你揀應該畫啲乜，況且幾個朋友畫畫吓又食吓嘢，時間好易過好開心！」蘊藏無限藝術細胞的Kabby，揚言將全力進軍影壇，更視張曼玉和張栢芝為奮鬥目標！